Les mots surlignés font l'objet d'une note
1Reçue à Crest, le 09 avril 1573.
2Monsieur de Gordes, je congnois bien que ce qui rend mes subgectz qui se sont eslevez
3tant obstinez est lespeerance qui leur est donnée destre assistez et secouruz de
4devers endroictz et que se sont artiffices de ceulx qui les veullent entretenir en ceste
5rebellyon pour leur interest privé; toutesfois, il ne fault negliger du tout telz
6advys, ains se preparer pour y remedier en cas quil en soyt besoing; et tout ainsy
7que sil avoyt à estre. Ce que je vous deyctz pour ce quil ma esté mandé que mes
8subgectz fugitifz se preparent pour venir secourir mesdits rebelles et leur promettent
9de venir quatre mil hommes de pied et environ mil chevaulx, ramassez tant à Berne,
10Genesve, que es envyrons, dont le sieur de St Romend doit estre chef; et doyvent
11descendre par la vallée de Grisvoldan pour se saysir de plus de villes quilz
12pourront aux montaignes de mon païs de Daulphiné; et après avoir secouru ceulx
13de Nysmes, sil en ont besoing, donner sur ma ville de Grenoble, en laquelle
14ilz ont quelque intelligences, se promettant que le sieur de Monbrun sest levé
15en leur faveur sy tost quilz entreront en campaigne. Au moyien de quoy, je vous
16prie y faire prendre garde, et neaulmoings sy dextrement que cella ne puisse
17croistre la deffiance en laquelle je scay que sont ceulx de la nouvelle oppinion,
18lesquelz sont demourez en leurs maysons. Jay receu votre lettre du XXIe de mars.
19Lon vous depeschera ung economat pour six mois, combien que jaye faict
20une ordonnance quil ne sen bailleroit plus. Je prie Dieu, monnsieur de Gordes,
21vous avoir en sa garde. Escript à Fontainebleau, le IIe jour de apvril 1573
22Charles
23de Neufville